In Nederland is meer as ein op de teen wethaaiers in 2019 weggesjtuurd. Det is in 15 jaor ut grootste aantal. Daonaeve zeen der ouch nog ins 75 wethaaiers opgesjtapt weges anger reeje.
Det is nog al gét. Haet netuurlik euverwaegend mit kwaliteit te make. Coalisies diej zichzelf in sjtandj haaie zórge daoveur det ut aantal weggesjtuurde wethaaiers neet nog hoger is. Zjwakke college’s haaie zich euvereind door biej missjténj weg te kieke.
Ouch Remunj haet zo ein college woh de foute zich maar blieve opsjtapele. De coalisiej kint de prebleme maar ze wille nieks kritisch heure euver häöre wethaaier in ut college. Conflicte mit werknaemers door de angscultuur in ut sjtadhoes breide zich oet.
Planne blieve ligke omdet bepaalde ambtenaere langdurig ziek zeen. Projecte kómme neet van de gróndj mit dezelfde reeje.
As ze dien oor te loester ligs dan is ut kómmer en kwel in Remunj.
Om de aandach van de megaprebleme aaf te leije leut ut college zeen waat ze allemaol veur leuke dinger gaon organisere in 2020.
Det létste duit mich dinke aan dae Remunjse burger dae eine prachtige auto veur de deur haet sjtaon, in de mooiste kleijer rondjlöp maar gein beligk op de bótterham haet, gein geldj haet veur de vaste woonlaste te betale en det allemaol om de sjien op te haaie det ut hem good geit. Remunj duit ut SJIENBAAR good maar de insider wit det veer veur ut huidige beleid de raekening vreug of laat gepresenteerd kriege.
Ich veursjpel det der in 2021 nog meer college’s in Nederlandj door ut ies zakke en nog meer wethaaiers en ouch börgemeisters zulle mótte vertrekke. Ich twiefel of dao de sjléchste leerlinge van de klas biej zitte.
Toet vaegs,
Dré. De sjtraotvaeger.
