Op de foto is dudelik te zeen det dit ein “döbbelbeeld” is. ’t Sjtelt de heks Hiasinte veur oet de “Sjinderhannes”van Emile Seipgens. “t Beeld is gemaak door Truus Coumans-Mevissen (Haelen, 5 april 1931 – 8 juni 2019). “t Kwaam eers te sjtaon op de Sjteinwaeg veur de bokewinkel van Henri Timmermans. ’t Waerde dao neergezat bie gelaegenheid van ’t 125 jäörig besjtaon van die zaak op 29 mei 1980. Toendertied kos-se dao zelfs ein muntje ingoje en dan heurde-se ein sjtök oet de Sjinderhannes. Henri Timmermans (1931 – 2003) sjpeelde, net es ziene opa, de rol van heks meerdere kere tösse 1968 en 1995. Det deej hae mit volle euvertuging, zo det hae ouch in ’t dagelikse laeve “De heks van Tummermans” waerde geneump. Es-se in ziene bokewinkel eine nuje agenda kochs had-se grote kans det op 30 jannewarie, handjgesjreve, al waas ingevuld: Naamsdaag van de Heks. Dit nao de heilige Hyacintha Clarissa Mariscotti (1585-1640).
Eine bekinde solo van de hekls is:
Och … kom, mien kienjerkes,
kom, mien kienjerkes, kom,
want het is weer fees vandaag
ich waer nog grootmama,
jao… kom, mien kienjerkes,
kom, mien kienjerkes, kom,
want het is weer fees vandaag
ich waer nog grootmama!
Väöl Remunjse miense dinke det dit döbbelbeeld Florenske en de heks veursjtelt. Det is volgens Henri Timmermans zellef neet waor mer hie is de verjonging van ’t Sjinderhannes gebeure in de Remunjse samelaeving bedoeld.
Teks en foto: Guus Rüsing.
