De brandjwaerkezerne aan de Krankewal waerde op 30 mei 1980 in gebroek genaome door de oettrekdeens. Vanaaf 1978 zoot dao al de alarmsentrale. Ten opzichte van de aaj kerzerne in de Lommersjtraot ware d’r väöl veurdeile. De wages koste allemaol binne gesjtald waere. Veur de mansjappe kwaam d’r meer ruumte. Eder kreeg zien eige sjlaopkamer in plaats van de eerdere sjlaopzaal. Vanoet de sjlaopvleugel op de eerste verdeping waerde eine litspaol nao geliekfloers gemaak zodet men sjnachs flotter kos vertrekke. Ouch de rejaal verbliefsruumte veur saoves en de waekinj waas ein verbaetering.
’t Geboe dateert oet 1910 en waas es eerste ein openbaar sjool. Larter kwaam de UTS dao. ’t geboe is ouch nog in gebroek gewaes es werkplaats van de Westrom.
De brandjwaer wie veer die noe kinne waerde opgerich in 1901. In de jaore 1898 / 99 waerde in Remunj waterleijing aangelach. Det goof ein nuuj sitewasie: men waas neet meer aafhankelik van pompe en pötte. Ouch de iefer van de aangeweze, “vriewillige” pötbewoners om brandj te blusse waerde minder. Dao op besjloot burgemeister Raupp toet ein totale reorgenesasie. ’t Veursjtel waerde op 26 jannewarie 1901 door de Raod aangenaome. Noe ging ’t flot: Op 29 jannewarie waerde eine kommedant, eine ongerkommedant en twee brandjmeisters beneump. Op 1 maart nog ins 18 brandjwaermen. ’t Blusmateriejaal sjting in de Graaf Gerardsjtraot, op de Hamsjtraot, bie de pliese op de Zjwamaekerssjtraot en ein handjsjpuit, laere ummers, eine waterbak en laere sjlange op d’n aje kirkhaof aan de Kepel.
De eerste kommedant waas G. Rammers, gemeintearsjetek. Ongerkommedant waerde J. Leeuwenburgh, administrateur van de waterleijing. De brandjmeister waerde J. de Kock, dirrektäör van de gaasfebruiek en J. Lucas, kopersjlaeger. De brandjwaermen ware: Berbers, de Bock, Brackenie, Broeren, van Brussel, Dorpmans, van Emden, Geelen, Hoefnagels, Janssen, Janssens, Kraurh, Mertens, op ’t Roodt, Straus, Verschueren, Wevers en van Zijl.
Hadde ze dees ploog mer gehad biej de grote sjtadsbrandj van 1554 en de sjtadsbrandj van 1665, dae op kirmeszunjig oetbrook.
Teks en foto: Guus Rüsing, zoon van eine vriewillige brandjwaerman.
