Ein kaers opsjtaeke aan de kepel. Det waerd nog dók gezach in Remunj. ’t Waas ’t toenmalige sjtadsbesjtuur van Remunj waat in 1418 de opdrach goof “buyten Zwartbruecker porten aan den Zande ein eenvoudige Mariakepel te boewe. Hie ontwikkelde zich gaondewaeg, waarsjienlik pas sinds ’t begin van de zeventeende eeuw, en sjterke verering van Maria. Sinds pas ’t inj van die zeventeende eeuw (1578) duuk de legende op van de herder dae ein Mariabeeldje gevonje haet in eine pöt. In 1863 kwame de paters Redemptoriste die naeve de kepel ein klooster boewde. Zie sjtimuleerde sjterk de Mariaverering.
Van oorsjrong waas de de Kepel ein buurtsjap boete de sjtadsmoere. Zoget op de plaats woi de weije aan de Roer euverginge in heiveljer. Op ein kaart van Jacob van Deventer oet 1550 loge d’r nege hoeser en boerderieje. De belangriekste ware de Ermehaof en de Muggebrokerhaof.nuuj. De eerste versie van de Kepelderwaeg waerde in 1730 aangelach.
In 1885 waerde ’t 450 jäörig jubeleum gevierd. D’r kwame zoväöl bezeukers det d’r planne gemaakt waerde veur ein nuuj kirk. De paters krege taegewirking van Biesjop Boermans dae bang waar det zien Kattedraal hiej onger zol lieje. ’t Doerde dan ouch toet 1895 veur det de paters toesjtumming krege. Op 1 mei 1895 waerde door daezelfde Boermans de eerste sjtein gelag. De kepel is ein ontweerp van de arsjetek Johannes Kayser. De nuuj kepel waerde euver de aaj haergeboewd zodet de deenste zolang meugelik door koste gaon. De Mariakepel biej de pöt oet 1878 bleef besjtaon. Op 30 april 1896 waerde de kirk ingezaegend. ’t Portaol aan de Kepelderwaeg is later door Pierre Cuypers ontworpe.
Op 5 november 1921 waas d’r eine zjwaore sjtorm dae de toresjpits verneelde. Waat veer noe zeen is waat drie jaor later door de arsjetek Casper Franssen waerde geteikernd. De twee teurkes aan de veurkantj weijde in november 1940 om en waerde neet meer vervange.
Foto: Arend Masius.
Tekst: Guus Rüsing.
