Vanaaf de Krankewal / hook Graaf Reinaldsjtraot löp ein sjuuns paad nao de Dr. Leurssjtraot / Biesjop Boermanssjtraot. Dan geit ’t aeve zo sjuuns wiejer in de Dr. Leursziesjtraot. In feite löp ’t diagonaal door ’t woonblok haer. ’t Haet geine naam.
Dees gats en de aansjloetende Dr. Leursziestraot volge ’t verluip van ein van de bastions van de vestingsjtad Remunj. Ein bastion is ein veuroetsjpringend deil van de verdedigingswerke, boete de sjtadsmoere, in Remunj gemaak van aerd. Ein bastion is aan drie kenj te verdedige en haet de vorm van eine veuroetsjtaekende, drieheukige, punjt. Vandao de sjuunste van dees gats en de Dr. Leursziesjtraot. Bie mien weite is dit de insigste plek in Remunj wo dit nog herkinbaar is, ouch in de verdeiling van de persele grondj.
De bastions rondj Remunj waerde vernuuijd aangelag in 1705 es antjwaord op de inname van de sjtad door de troepe van de Republiek onger leuijing van Menno van Coehoorn in 1702. Van alletwee de sitewasies besjtaon kaarte, te vinje in ’t Nasionaal Arsjief en de Universiteitsbieblioteek van Leide. In 1784 maakde Keizer Josef II van Oosteriek ein inj aan de sjtatus van vestingsjad omdet det neet meer pasde in de modern oorlogsveuring. In de tied daona waerde porte, tores en bastions gesjlech en de sjtadsgrachte mit de aerd gedemp.
Vraemd is det aan ’t begin van de Graaf Reinaldsjtraot gein sjtraotnaamplaetje sjteit. Es dit door de Gemeinte waerd opgehange kinne d ‘r mesjiens ouch twee naambördjes “Het Bastion – ’t Bastion” vanaaf.
Eine geïnteresserde laezer is op zeuk nao ein filmpke waat ooijts euver t Bastion gemaak is. “Het laatste bastion – Roermond'”. Waem kint dao helpe?
Foto’s en teks: Guus Rüsing.
