De boegesjiedenis van dit Prinsehaof begint mit eine ramp veur de sjtad. Op 31 mei 1665, mit de sakkrementspersessie, brik d ‘r eine enorme sjtadsbrandj oet. Ouch de deensweuning van de Sjadhajer van ’t Euverketeer van Gelre geit in vlamme op. Euver dit aad Prinsehaof is neet väöl bekind. Waal weite veer det nog in 1654 eine grote verboewing waerde doorgeveurd. ’t Besjtaonde geboe aan de huidige Pollartsjtraot waerde toen oetgebreid richting Munstersplein. 
De herboe van ’t nuje Prinsehaof ging meuijzaam. Veer weite det de puine d’r in 1670 nog sjteeds loge. Toch waerde nao de brandj van 1665 al drek planne gemaak door de Luukse arsjetek Bertolet Flemalle. Die waerde al op 25 julie 1665, nog gein twee maondj nao de katestrofe, besjpraoke in ein vergadering van de Gedeputeerde Sjtaote van ’t Euverketeer van Gelder, en, wie ’t sjient, goodgekeurd. In augustus van detzelfde jaor konstetere diezelfde Gedeputeerde Sjtaote det ’t al te laat in ’t sezoen is om mit de herboe te beginne. Baeter is ’t toet ’t volgend vreugjaor te wachte. Mer, dan begint me nog neet. In april 1666 waere nog planne van diverse anger arsjetekte bekeke en besjpraoke. Op 8 mei 1666 waerd dan gekaoze veur ’t plan van de Minderbroeder Joseph van Halle.
Joseph van Halle waas ouch de ontwerper van ’t pelies van de biesjop (de aaj rechbank aan de Pollartsjtraot) en de toenmalige sjpits van de tore op de Kattedraal.
Dan sjrieve versjillende aannaemers in om eine pries aaf te gaeve. De keus völt op de leegste insjriever, meister Gelis Dirix oet Gent.
In april 1667 kump de Sjadhajer Isenghien in ins oet Vinlo, wo hae tiedelik woonde, aanzitte in de vergadering van de Sjtaote mit eine Simon van Campfort, dae ouch ein ontwerp haet gemaak. Det beväölt dae Sjtadhajer kinnelik baeter es ’t ontwerp van broeder Joseph. ’t Waerd zonger sjlaag of sjtoot goodgekeurd en men begint mit ’t oetzitte van de plattegrondj op ’t terrein. Toen bleek, omdet me nog persele mos aankoupe, det zeker nog neet waas begos mit ’t aad plan waat al waas goodgekeurd en aanbesjtaeijd. Simon van Campfort krieg ’t verzeuk zien planne verder oet te wirke. (Waerd vervolg).
Foto’s: Arend Masius.
Teks: Guus Rüsing.
