Tweede paosdaag, 13 april 202O

Of 't verhaol van giester euver de godin Ostara die ein veugelke in eine haas verangerde waor is, zolle veer waal nooijts te wete komme.

Waal weite veer det 't versiere van eier vöäl ajer is es de kristelike tradisie. In zuud Afrika zeen versierde vogeleier van 60.000 jaor aad gevonje. Ouch in graver van Soemeriërs en Egyptenaere waerde versierde eier van 5000 jaor geleje gevonje. In Mesopotamië waerde door de eerste Kristene eier rood geverf om te herinnere aan 't blood van Kristus.

Het kleure van eier waas ouch heel prakties: De aaj vasteveursjrifte van de kattelike kerk verboje 't aete van eier van Asselegoonsdig toet Paose. Dit zeen zes waeke. Om eier toch te kinne beware waerde die helgekaok en om aaj eier van jongere te kinne ongersjeie krege die sjteeds ein anger kleur. Mit Paose hat men dan versjille kleure bie ein.

In de kristelike ikonopgrafie is 't ei symbool veur de opsjtanjing van Kristus oet 't graaf. Soms waerde 't äöpene van de sjaal vergeleke mit de äöpening van 't Graaf. Ouch kump 't ei op sjilderieje van Maria veur es symbool veur de ontvangenis door de Heilige Geis.

Gekleurde en versierde eier zeen dus zo aad es de miensheid en komme bie väöl völker veur.

Nog get veurbeelde zeen de geverfde eier van 't Noeroes fees van de Zoroastriërs en de Jezidi, die zo sjerk vervolg zeen, oet Iran.

De Sjinese rood geverfde eier symbolisere ein nuuj begin, ze waere dök aan gaste aangebaoje bie de eerste verjäördig van ein kiendj.

In de Koran komme eier veur es symbool veur maagdelikheid, beveurbeeld in Soera 37, As-Saffat - Die, die zich opsjtelle, Vers 48-49: En bie häör zalle zuver vrouwluuj zeen (...), rein of det 't mit zörg bewaarde eier ware.

Teks en foto: Guus Rüsing.