Vanaaf 1 december is ’t religieuze kunswerk de Passietaofel weer trök in Remunj. Det wilt zegke: ’n getroewe replika van ’t orzjenele middeleeuwse sjilderie, det noe deil oetmaak van de vaste kolleksie van ’t Rieksmuseum.
De passietaofel omvat 18 sjilderinge oet ’t laeve van Christus. ’t Is ein van de aajste kunswerke van os landj.
Op 1 december waert de Passietaofel onthuld tiedes de offisjele äöpening van ’t herdinkingsjaor ‘800 jaor Munsterkirk’. Dit gebeurt nao de Pontificaal Mes van 10 oer in de Munsterkirk. Bösjop Harrie Smeets zal ’t kunswerk onthulle.
Bie de äöpening van ’t herdinkingsjaor zalle ouch gedeputeerde Hubert Mackus en minister Raymond Knops aanwezig zeen.
Ederein is welkom om de H. Mes en de aansjloetende onthulling bie te wone.
