De arsjetek Nicolaas van der Schuit (1854 – 1923) waerde op 6 juli 1854 gebaore in ’t Friese Oudega. Hae haolt in Amsterdam de middelbaar ongerwies akte lien- en perspektief teikene. In augustus 1875 kump hae nao Remunj wo hae geit werke in ’t ateljee van Pierre Cuypers. Op 23 mei 1882 trouwt hae mit Maria Hubertina van Mechelen. Ze gaon wone aan de Minderbroeders. Later verhoesde de femilie nao ein van de hoezer aan de Frans Douvensjtraot die door Cuypers zeen geboewd veur zien personeel. Nog later geit hae wone in ein door hemzelf ontworpe hoes aan de Aje Boelvaar. Naeve zien werk veur Cuypers veurt hae ouch veur zich zellef opdrachte oet en guf hae privé lesse in de aovesoere en zellefs ‘s-zunjigs van 9.00 toet 12.00 oere.
In 1902 waerd ein boevergunning aangevraog veur twee woonpanjer aan de Kepelderwaeg 241 en 243. Opdrachgaever is ’t echpaar Leenarts-Bloemertz. Op nommer 241 zeen veer eine in tradionalistiese sjtiel ontworpe gevel in drie boewlaoge mit eine trapgevel. Baove de winkelpui zeen rooj, broen en gael baksjtein verwirk, deils es zogenaamde sjpeklaoge. De segmentbäög baove de vinsters höbbe siermetselwerk en det is ouch onger de daakrandj te zeen. De moerankers in de tweede boewlaog zeen van dekoratief sjmeediezer. De dörpels zeen van Naamse sjtein.
Nommer 243 is in daezelfde traditionalistiese sjtiel opgetrokke es woon- en winkelhoes. Versjillende kleure baksjtein, sjpeklaoge en ouch hiej siermetselwerk onger de gäöt en bie de vinsters. Dörpels van Naamse sjtein en ein gepleisterde plintj aan de ongerkantj.
Wie versjillend ouch, is toch good te zeen det de twee hoezer door dezelfde handj geteikend zeen.
Teks: Guus Rüsing.
Foto’s: Stoffel.M
