De gesjiedenis van dees kirk geit teruuk toet in de Middeleeuwe. In ’t jaor 1307 sjtichde Graaf Reinoud I van Gelre hie ein klooster van de Minderbroeders (Franciskane), vlakbie de sjtadsmoer. In ’t begin van de viefteende eeuw zol naeve dit klooster de eerste kirk zeen geboewd. ’t Goties koor en ’t middesjeep sjtamme nog oet deze tied. De tore, oet daezelfde tied, waerde in 1692 gesjloop. Aan ’t begin van de zesteende eeuw waerde de noordelikke en de zujelikke beuke aangeboewd. Waat veur noe zeen is ein gotiese hallekirk van baksjtein. Aan de weskantj van de kirk is ein sjtök van kaolekalk ingemetseld, waat meugelikkerwies van de sjtadsmoer oet de derteende eeuw kump.
In 1572 waerde de kirk door troepe van Wullem van Oraanje geplunderd en in 1576 weer opgeknap. In 1710 waas d ‘r eine grote brandj door bombardemente op de sjtad in de Sjpaanse suksessieoorlog.
In 1796 joge de Franse de Minderbroeders weg en de in besjlaag genaome kirk waerde gebroek es paerdssjtal en streuij – en huijmagezien. De paters kwame nooits meer teruuk.
In 1820 waerde ’t koor van de kirk ter besjikking gesjeld aan de Hervormde Gemeinte van de garnezoenssjtad Remunj. In 1864 waerde ’t ganse geboe aangekoch, ’t Klooster waas al ’t jaor daoveur gesjloop. Tösse 1906 en 1908 waerde de kirk onger de leijing van Dr. Pierre Cuypers gerestereerd. Verder waerde de kirk in 1947 en 1986 gerestereerd. De aerdbeving van 1992 brach grote sjaaj. De dao op volgende resterasie doerde twee jaor.
In 1973 waerde besjlaote det de Hervormde Gemeinte en de Gereformeerde Kirk same ginge. Damit waerde ’t Gereformeerde kirkske aan de Kepelderwaeg, oet 1920 euverbodig. Dit waas eigenlik al ’t flink Remunjse veuroetloupe op de oprichting van de Protestantse Kirk Nederland in 2004. Noe kirk hie dus de Protestanse Gemeinte Remunj.
Teks en foto’s: Guus Rüsing.
