In ein aaj sjtad wie Remunj is eigelik ’t motto “Kiek omhoog”. Mer vandaag kieke veer ins omleeg. Midde op de mert in Remunj is in de kienjerköpkes te zeen det zich dao twee roetes kruutse. De ein kump van oet de Zjwamaekerssjtraot van de Vinloseport in ’t Noorde en geit nao de Zalt onger aan de Mert. Zalt waas ein heel belangriek produk om vleis en greunte te kinne beware. Det zalt kwaam o.a. vanoet de Gelderse sjteej en dörper aan de Zujerzee nao Remunj. De anger roete hit de presessieroute en geit van de Verkesmert (mit efkes wiejer de Munsterabdie) nao de perochiekirk oftewaal de Kattedraal.
Midde op de mert lik eine ronje sjtein dae de ingewikkelde historie van Remunj priesguf.
Van 1200 – 1543 graafsjap, later hertogdom Gelre. Van 1543 – 1702 de Sjpaanse Nederlanje. Keuning Philips II haet zich noch in persoon in Remunj laote inhuldige es hertog van Gelre. Dan efkes ein Hollands intermezzo wonao veer van 1713 – 1794 bie de Oosteriekse Nederlanje beheure. In 1794 komme de Franse en zeen veer ongerdeil van eers de Franse republiek en dan ’t Keizerriek.
Det duurt zo get toet 1814 es de Verenigde Nederlanje ware opgerich. In 1830 doon veer mit euvertuging mit mit de Belzje opsjtanjd en blieve toet 1839 Belsj. Dan gaon veer weer truuk nao ’t Keuninkriek de Nederlanje mer eine lange tied neet es provinsie mer es Hertogdom Limburg.
Dit is netuurlik in vogelvluch en d’r heurt zeker noch ein perode bie: Van september 1944 toet 1 maart 1945 waas Remunj “einverleibt” in de Gau Düsseldorf en waas dus Duits.
Teks: Guus Rüsing.
