Aan de randj van Remunj vindj geer Sjpeeltuin Kitskensberg. Deze sjpeeltuin kent zat sjeem door de väöle buim op ’t terrein van mer leefs zes hektaar. Zo’n 80 sjpeeltoesjtelle zorge veur genog sjpas en beje versjillende sjpeelomgaevinge. Klumwendjes, ’n tokkelbaan, ’n wankelbrök, ’n piratesjeep, complete forte, zandjbek, wippe en roetsjbane zorge d’r veur det alle kinjer van 2 toet 12 jaor zich good kinne ammezere. Es ’t boete werm genog is (zo’n 22 grade), kint men aafkeule in ’t pierebad. Ein doolhaof maak ’t extra sjpannend. D’r is zat ruumte om gezellig te piknikke op benkskes en graasveldjes. Deze prachtige sjpeeltuin is ouch good toegankelik veur minder valide kinjer. En wiewaal d’r gein hoesdere binne moge, zeen hulphunj waal welkom.
Waat ooit ‘ns ein noodsupermert waas, en later ’t kinjerdaagverblief Olleke Bolleke, waerde de nuje werksjuur. ’t Geboew waas zo’n 40 jaor aad en veel bekans inein, zodet ’t hel aan vernujing toe waas. ’t Waas neet mekkelik om aan sjponsorgeldj te komme, mer de Sjpeeltuin leut weite det ’t gelök is om de sente biejein te kriege om de sjuur te vernuje. Dao haet men zo’n veer jaor hel aan gewerk, en noe is ’t eindelik zo wied.
Op 15 november om 16 oer waerd de nuuj werksjuur geäöpend! Veer neudige uch allemaol oet om dao bie te zeen.
