De Sjtraotvaeger – De gepaeperde meining van de doorsjnee burger van ós Remunj die door mich zeen opgeteikend. Mit de algemeine besjouwinge veur de deur is ut good om ins de balans op te make euver ut politieke klimaat in ós gemeinte. 31 raodsleeje (woh van de hellef gein Remunjs DNA haet) gaeve ein kollege (woh amper ein lid Remunjse DNA haet) de ruumte. Zjwaak oetgedrök det geit neet good.
De coalitie (laes meerderheid) haet ein kollege gevormp det de taak neet aan kan. De burger is de klos as neet aan de verwachtinge waert voldaon en det létse sjtik sjteeds meer de kop op. Op ein waek tied höb ich teentalle burgers gesjpraoke diej meer dan ontevreeje zeen. Ein alleinsjtaond meuderke mit ein gehandicap kiendje blief in de sores zitte. Dao ware tieje det zo gét in eine daag waerde opgelós. Drie burgers die in óngerhanjeling zeen mit de gemeinte óm sjtökskes gróndj te koupe waere al ruum ein jaor aan de lungel gehaaie. Eine hobbyboer moog ziene tractor neet meer sjtarte. Ein eredivisieclub in de zaal kin neet optimaal traine, twee groepe bewoners blieve euverlas haaie van sjnoevers (terwiel oplossinge klaor ligke) lachgaspatrone waere sjteeds meer aangetroffe in de openbare ruumte, euverlasgaevende jongere naeme sjteeds meer de regie. Mit ein zjwaak kollege lós ze nieks op. Alles waert veur häör oetgesjaove. Geine röggegraod höbbe die in det kollege. As ze dan ouch nog ins eine dirigent höbbe die de maot wilt sjlaon en de eerste pertiej wilt blaoze zónger det ze ut sjtök kint geit ut mis.
‘De toon maak de meziek’ maar hiej kómme allein maar valse tone oet. Dus zeen de klanke neet om aan te heure en loupe de loesteraers massaal weg. Allein de jury (laes raod) mót blieve zitte en punte gaeve. De punte blieve good omdet de meerderheid häör eige órkes neet aafzeik. De dirigent houwt op de dieke trom, de trompettist bleus zónger mondsjtök, de sjlaagwerkers zeen van de sjték aaf en de dwarsfluit haet de verkeerde pertie.
Kortom ‘kómmer en kwel’ en neet riep veur Passion op sjtraotniveau.
Oplossing
Ich zal waekeliks kritisch zeen maar ouch ein oplossing aandrage. De dirigent vervange. Ouch degene die de eerste pertiej neet kinne sjpele nao hoes sjture. Dao zit ónger de meerderheid en ouch ónger de minderheid zat kwaliteit om dees plaatse op te vulle en ut loesterend pebliek zal weer toesjtruime.
Toet volgende waek,
De Sjtraotvaeger.
