Op zonjig 1 december organizeert “Nooit Te Oud?!” van 14 toet 17 oer ‘ne Aope Daag in ’t Hermenie Paviljoen en Wiekgeboew De Vlonder.
“Nooit Te Oud?!” is ’n samewirking van ECI cultuurfebriek, Wel.Kom, de Keuninklikke Hermenie Remunj en de gemeinte Remunj. ’t Projek is ongerdeil van ’t lanjelikke trajek “Age Friendly Cultural Cities” (laeftied vruntjelikke cultureel sjtaej), wo Remunj es innigste Limburgse sjtad aan mit duit. In 2019 en 2020 beje veer versjillende creatieve aktiviteite (meziek, toneel en beeldend) veur ederein van 55 jaor en ajer in de gemeinte Remunj.
Tiedes oze Aope Daag kint geer komme preuve van os väölziejig aanbod. Kom kieke, doot mit en laot uch verrasse!
Wilt geer gaer (opnuuj) ’n meziekinsjtrument besjpele, mitzinge in ’n koor, lere om ’n verhaol te vertelle of ’n amulet make van serpetien? Deze zonjig kint det allemaol!
Bie versjillende workshops kint geer eur talente (opnuuj) oetvinje en kieke waatv’re kurzes biej uch pas. Ouch zeen d’r diverse optraejes van deilnummers van ’t veurig jaor. Zo laote de entoezjaste deilnummers van os blaozers- en koorklasse in 2 minikonzaers heure waat ze geleerd höbbe. Dees optraejes waere omlies door ’n muzikaal naeveprogram.
Boete de workshops en optraejes is d’r deze middig nog väöl meer te doon en te belaeve. Maak ’n rundje naeve de informasiemert en kiek waatv’r kurzesse binnekort sjtarte. Laot uch inspirere door de exposisies mit kunswirke van os kurziste teikene en sjildere. Of laot uch verwonjere door de filmopnames van “De vissen komen, mild”: ein echte toneelveursjtelling gesjpeeld en gezonge door os eerste toneelkurziste. En wilt geer daonao efkes biekomme van alles? Gein perbleem: veer sjödde uch gaer ein tas koffie in. Veer haope uch te verwelkomme op zonjig 1 december van 14 toet 17 oer in ’t Hermenie Paviljoen en ’t daonaeve gelaege wiekgeboew De Vlonder, Florasingel 38-40 in Remunj.
Meer informasie euver de Aope Daag en os kurzesaanbod kint geer vinje op:
www.nooitteoudroermond.nl
