Ut raegent klachte in ut sjtadhoes. Börgers zeen ut zat det ze door ut sjtadsbesjtuur dök neet serieus waere genaome. Sjtraote diej maonje aope ligke en nemes op ut sjtadhoes dae zich geroope veult om de luuj die vraoge óm de reeje te waord te sjtaon.
Ein wiek die ‘mit vandaag op mórge’ ein verbod krieg óm häöre auto te parkere veur häör eige deur. Nao flink protestere is der nao ein half jaor ein biejeinkóms mit de gemeinte. Nemes kin oetligke whoróm zake zeen geloupe wiej ze geloupe zeen. Mit ut sjaamrood op ut gezich geit de veranjwaordelikke wethaaier nao hoes. Omdet de deensdoonde ambtenaer weigert om ein versjlaag te make en de wethaaier de zaak op zien beloup leut gaon is ouch dees zaak weer terök biej aaf en geit de buurt in conclaaf biej de raod. Ein dörp die al teen jaor vraoge óm geheurd te waere en sjteeds nul op rekest kriege. Ut zogenaamde centrumplan blief ónger in de laai ligke. Sjportvereniginge die euverlas óngervinje van sjnoevende en zoepende jongere en al vief jaor vraoge óm oplossinge. Buurte diej door de gemeinte getraineerd waere as ut geit om ein oplossing te vinje veur de drugseuverlas in häör buurt. Ut sjleijp maar door. De ein zaak duurt maonje en de anger al jaore. Insjpraak is in Remunj neet meer as eine oetsjpraak dae toet opsjpraak leidt.
Remunj is sjterk in luchfietserie maar zake diej neet loupe oplosse is onmeugelik. De eine wethaaier belaof goude berge en kump nieks nao, De angere löp aan de handj van de ambtenaere langs valkoele diej ze zelf gecreëerd höbbe. Ze höbbe allemaol te weinig expertise om zake op te losse. In det Remunjs sjtadsbesjtuur is der ouch geine échte leider. Jaomer want Remunj haet dringend eine ommezjweij neudig. Mit eine Passion wins gein vertroewe en zeker neet as det ein vermoge kós. Geweun nao de burger toe om same mit häör te wirke aan oplossinge det waert gevraog. Neet de burger opzadele mit sores en dan zégke los ut maar zelf op. Maar dao zal de besjtuurder waal de taal van ut volk veur mótte sjpraeke en zeker ouch kinne versjtaon. En det létste ontbrik der aan of ze wete neet waat de burger wilt omdet de Remunjse besjtuurder zich versjtóp en neet zichbaar is. Wiej jaomer…Remunj verdeent baeter.
Beste besjtuurders ut is nog neet te laat maar de tied löp uch weg.
Pak deze hanjsjoon op of vertrek…
Ich help Uch gaer mit de kofers pakke.
Uche Sjtraotvaeger Dré.
Toet vaegs.
