Op 31 mei 1665 kinde Remunj ouch eine grote ramp. Bie de grote sjtadsbrandj, de tweede, ginge achhongerd hoezer in de fik, wo onger ouch ’t hoes waat op dees plek sjting. Nao deze branjdj waerde ’t boewe van nuuj hoezer sjterk gesjtimeleerd door ’t sjtadsbesjtuur. In 1666 waerde op enig moment aan veerhongerd hoezer tegeliekertied gewerk.
’t Nuuj hoes op dees plaats waerde geboewd door Peter van Boshuijzen. Deze waas scholtis in Ech en rentmeister van Mofert. t Hoes is van ’t begin aaf ingerich gewaes es döbbel herehoes mit twee veurdeure en binne ein sjtevige sjeijingsmoer. ’t Romantise verhaol det zaliger Ome Jo Hansen altied vertelde det Peter van Boshuijzen onger ’t boewe ruzing kreeg mit ziene zoon en det d’r daorom twee gesjeije ingeng waerde gemaak is dus neet waor. Peter waas in 1663 getrouwd mit Maria Holtman. Oet dit huwelik warde de volgende kienjer gebaore:
1. Maria, geduip in Mofert op 21 augustus 1664 en dao gesjtorve op 30 augustus 1664.
2. Helena Clara, geduip in Mofert op 6 mei 1666.
3. Loduvicus Franciscus, geduip in Remunj 29 mei 1667.
4. Aldegondis Joanna, geduip in Remunj op 3 desember 1668.
5. Evaldus Loduwicus, geduip in Remunj op 1 fibberwarie 1671.
6. Maria Rosa, geduip in Remunj op 6 november 1675.
7. Andrea Barbarina, geduip in Remunj op desember 1676.
In ’t fronton sjteit sjtols ’t jaortal 1666 en de inisjiale P v B. De vraog is mit welke zoon Peter in 1666 ruzing gemaak mot höbbe> Konklusie: Dae goje Ome Jo Hansen haet os get wiesgemaak!
Guus Rüsing
