Vlakbie de Kattedraal, aan de Pesjtoorswal, sjteit de Rattetore. Dit is ein euverbliefsel van de sjtadsomwalling van ongeveer ’t jaor 1300. Deze ronje, baksjteine, hooktore is meugelik oet ’t letste kwaart van de 14de eeuw. De sjpits van de Rattetore waerde al bie de eerste sjtadsbrandj van 1554 verneeld.
In 1782 noom keizer Josef II van Oosteriek, dae toen de baas waas in Remunj, ’t besjloet de vesting Remunj op te heffe en de verdedigingswerke aaf te braeke. Es verdediging taege kenonne ware die nutteloos gewaore. Mit de puine vulde men de sjtadsgrachte. Det werk waas neet aaf wie de Franse kwame mer die lete ’t wie ’t waas. In de Belzje tied (1830) begos men weer obbernuujts in ein saort van werkversjaffing. Zo taege 1843 waas men klaor. Aan ’t inj van de negenteende eeuw kwame op de plaats van de grachte de singels wie veer die noe kinne. Zo kinne veer op vandaag de omtrekke van de middeleeuwse sjtad rondj 1550 nog sjteeds zeen. Die moer waas 2895 maeter lank en had 24 tores en teen porte.
De Rattetore is, mit de Cattetore, de grootste herinnering die veer nog höbbe aan de aaj sjtadstores. Waarsjienlik is hae bewaard gebleve omdet vlakbie ’t kirkhaof van de Kattedraal loog (rechs op de foto). Det waas angers gans omleeg gezak.
De naam Rattetore kump waarsjienlik omdet in de buurt ein grote voelnisbelt loog, dao krioelde ’t van de ratte. De Wilhelminasingel hit noe nog altied ’t “Sjtort” in ’t Remunjs.
De tore is eigendom van de gemeinte Remunj. In 1976 waerde op inisjiatief van de Remunjse aannaemer Louis Scheepers zaliger ein resterasie doorgeveurd en kwaam d’r ouch weer eine nuje sjpits.
Teks en foto: Guus Rüsing.
