As ze dich eine waereld wils veursjtelle woh de börgemeisters de machshöbbers zeen dan kump de coronacrisis aardig in de buurt. Sinds de lockdown waert Nederland veur ein belangriek deil geregeerd door de noodverordeninge van de veiligheidsregio’s – woh veur zelfs soms de Grondjwet mót wieke. Dao haet de Tweede Kamer of de gemeinteraod nieks euver te zegke. Hiej dreig ein Demokratisch tekort sjrief gerechtsgeleerde Wim Voermans. Sjterker nog: volges juriste moog de mach van de burgemeisters hillemaol neet zo ver reike.
Die mach en oethólle van de Demokratie is noew zeer actueel. In de tweede kamer, previncie en gemeinteraod waert ut neet zo nouw genaome mit veursjtelle. Ouch in de Remunjse politiek griepe ze Corona aan óm kritische vraoge te ontwieke. Ónger ut mom ‘beste raod neet te väöl vraoge sjtelle in deze coronatied, want ut college wit waal waat good veur Remunj is’ waere de volksvertegenwoordigers móndjdood gemaak.
Det juus dit college haet beweze éch neet te wete waat good veur Remunj is det moge duudelik zeen. Prangende vraoge, waat ein en anger gekós haet waat neet door is gegange, waere op de lange baan gesjaove.
De raekening ligk sjtraks op ut bordje van de burgers. 7 mei is der ein raodsvergadering die de 31 raodsleeje en ut college digitaal mótte doon. Mit al de beperkinge die der dan al zeen waert de agenda flink ingekort, waere belangrieke punten hamersjlaeg en waere prioriteite sjléchs summier besjpraoke. Dit kump de coalisie good oet.
Maar gluif mich det ich mich éch tekort gedaon veul. Eine volksvertegenwoordiger mót altied kinne opkómme veur de burger. In de raodzaal en ouch dao boete. Gelökkig höbbe veer aafgeloupe waeke weer aardig gét luuj kinne helpe mit häör prebleme. Veer blieve bereikbaar veur ederein of det noew dae kleine zelfstandige is dae óm advies vreug of de Remunjse burger dae in Zuid-Amerika door de corona neet weg kump.
Dao ligk ós taak en die veure veer oet. Dees waek had ich ein prebleem euver de gemeintegrenze haer en vroog óm advies biej wethaaier Arno Walraven van Leudal. Waat ein opluchting det ich dae man geweun kós belle en mit hem de casus kós besjpraeke. Waat eine super wethaaier.
Toen dach ich aan de gooie aaie tied toen Remunj nog collegeleeje had die bereikbaar ware veur raodsleeje. In Remunj mótte raodsleeje eine aafsjpraok make via ut sikkertariaat óm mit collegeleeje te kinne kalle. ‘Hoezo de raod is ut hoogste orgaan?’. Sjnel weg mit dit sjtadsbesjtuur en de coalisiej en de kaarte opnuuj sjöddele zodet allein kwaliteit de sjtad kin en moog besjture.
Veurdet te kinne bereike is de burger aan ut waord in maart 2022.
Ich bin al aaf aan ut telle.
Toet vaegs,
Dré, Uche Sjtraotvaeger.
