Aan de Neersjtraot nummer 10 lik ’t pandj van ’t veurmalige loodgetersbedrief Frans Janssens-Höppener. Dit is geboewd in de 19de eeuw. In 1911 waerde de veurgevel vernuujd nao ein ontwerp van de Remunjse arsjetek Frans Dupont. De sjtiel waerd eklektisch geneump mit elemente oet de Jugendsjtiel. In feite is ’t eine döbbele winkel mit ein baoveweuning.
’t Sjtuukwerke beeld boave in is van de beeldhajer Mathieu Reynders dae in de kunswirkplaatse van Cuypers en Stolzenberg zien brood verdeende. ’t Sjtelt ein godin (?) veur mit eine grote branjende fakkel in de linkse- en eine palmtak in de rechterhandj. Daobaove sjteit ’t jaortal 1911.
Gelökkig zeen de felblauwe kleure van eine tied terök weggehaold en haet de gevel noe weer de oorsjronkelikke zaachte kleure.
De veurdeur van ’t woonhoes haet eine sjitterde klopper in de vorm van eine lewekop.
Foto’s en teks: Guus Rüsing.
