Nu sjteit ’t aad Postketoor half vrie op ’t Kloosterwandjplein. Det waas ins angers: ’t loog geweun in de rie aan de sjtraot Achter Kloosterwandj. ’t Waerde geboewd in 1907, wie in ’t teurke bovenin te zeen is. ’t Waas ein ontwerp van ’t buro van Rieksboemeister Ir. Knuttel. Kinners meine hie get van de sjool van Berlage in te herkinne.
Gebroek zeen baksjtein, veur ein gedeilte mit glazuur, en leteie van Naamse sjtein. ’t Teurke waerd afgedek mit ein tentdaak mit Hollandse panne en leet os twee lewe zeen mit ein waopensjild in de peut. In de derde boelaog, baove ’t balkoen, is ein klok te zeen mit dao omhaer ein veerkenjtige omliesting van Naamse sjtein. De vinsters höbbe greun geglazuurde dörpelsjtein mit lateie van Naamse sjtein.
De oorsjronkelikke hoofingank lik rechs in de Kloosterwandjsjtraot. Det is nog te zeen aan ’t tegeltablo baove de deur mit ’t Waope van Nederlandj mit plante, blome en oranje-eppelkes.
“t Geheel is Rieksmonement en haet noe de funksie van Japans resterant.
Teks en foto: Guus Rüsing.
