De heks Hiasinte sjpeelt ein belangrieke rol in de “Sjinderhannes” van Emilie Seipgens. Es moder van Sjinderhannes leet zie häöre zoon door de ruivers es hoofman keze. Zie is ’t ouch die ’t plan ontwikkeld om de duvel te sjlum aaf te zeen es d’r de zeel van Sjinderhannes kump haole. Es Hiasinte heurt det Sjinderhannes zien zeel aan de duvel haet verkoch zingk zie de volgende teks:
Doe prie, waat höbs-se noe gedaon?
Ich mos dich op dien waemes sjlaon!
Dae zjwarte költ dich wo-s doe sjteis,
en kump dich aan dien zeel en vleis.
Dae zjwarte költ dich wo-s doe sjteis,
en kump dich aan dien zeel en vleis.
Det zie ’t volkomme ins is mit Florenske es sjoondochter bliek oet:
Ich had dich ouch det kiendj gebrach,
hads doe ’t mich maar eer gezag,
mer wach, ich haol ze dich nog vaort,
dao-op gaef ich mien heksewaord.
Mer wach, ich haol ze dich nog vaort,
dao-op gaef ich mien heksewaord!
Es heks haet zie bie de ruivers gezach genog om te zorge det häöre zoon kapitein van dae troep waerd, zodet Zjwarze Peter zien dochter neet kint weigere aan Sjinderhannes:
lch weet eine ruiverstroep bie ein,
daovan is Peter kastelein,
ich maak dich kapitein daovan,
zodet d’r ’t dich neet weigere kan.
Ich maak dich kapitein daovan,
zodet d’r ’t dich neet weigere kan!
Det de heks ein kordate dame is heure veer es zie veursjpelt wie ’t mit de duvel zal gaon es d’r kump om de zeel van Sjionderhannes te haole:
En kump de duvel hie terök,
dan jeuk hem lang nog ziene rök,
es hae kump vraoge nao dien zeel,
dan veult d’r miene bessemsjteel.
Es hae kump vraoge nao dien zeenn
Dan houw ich hem eine sent diek zjweel!
Mit deze solo van de heks höbbe veer in feite in ’t eerste bedrief al ein samevatting van ’t ganse verhaol: Sjinderhannes waerd ruiverkapitein, krieg zien Florenske en de duvel kump d’r mit ein gesjeld sjtekske vanaaf.
De volgende keer ein interessante onthulling euver dit döbbelbeeld. ’t Sjeit allewieles op de hook van de Bröksjtraot / Neersjtraot en is van de handj van Truus Coumans (1980).
Teks en foto: Guus Rüsing.
