Keuningsdaag waerd sinds 2014 gevierd. Daoveur hadde veer van 1891 toet en mit 2013 Keuniginnedaag en nog daoveur van 1885 toet en mit 1890 Prinsessedaag.
In de negeteende eeuw waerde jaorelank op de 18de junie “Waterloodaag” es nasjionale feesdaag gevierd. Bie de Sjlaag van Waterloo in 1815 waerde Napoleon defenitief versjlage door Britse, Hannoverse (mit anger Duitse aafdeilinge) en Nederlandse troepe onger de leijing van de Hertog van Wellington aan de eine kantj en ein Prusies leger onger von Blücher aan de angere kantj. Op ’t lets van de negeteende eeuw waas van de herinnering aan deze sjlaag neet meer väöl euver en waerde dae daag nog klamp gevierd.
Op 31 augustus 1885 waerde de eerste Prinsessedaag gevierd op de 5de verjäördig van Prinses Wilhelmina. ’t Inesjatief kwaam van de hoofredaktäör van ’t Utrechtsch Provinciaal en Stedelijk Dagblad, eine zekere heer Gerlach. Netuurlik waerde dit fees in Utrech gevierd, naoderhandj nome ouch anger sjteej dit euver. Nao det Keuning Wullem III in 1890 gesjtorve waas waerde in 1891 veur ’t eers Keuniginnedaag gevierd. Wilhelmina waas jao nao de dood van häör vader offesjeel Keunigin gewaore, mit häör moder, Emma von Waldeck-Pyrmont, es Keunigin-regentes. Op häöre achteende verjäördig, 31 augustus 1898, waerde Wilhelmina zelf regerend Keunigin. Toet en mit 1948, wie zie aafsjtandj van de troon deej, waerde op 31 augustus Keuniginnedaag gevierd.
Wie Juliana häör moder in 1948 had opgevolgd waerde vanaaf 1949 Keuniginnedaag op häöre verjäördig, 30 april, gevierd. De nuuj Keunigin maakde dao ein fees van waat zich aafsjpeelde op ’t bordes en de häöf van pelies Soesdijk, mit ’t bekinde defile. Det waas later in de jaore vieftig ouch op de televies te zeen. ’n Bekinde “act” waas die van de Remunjse buteredner Ton Jorna zaliger mit ziene groep mit klein obers. In 1971 ging ’t defile neet door omdet op dae daag de moder van Prins Bernhard, Prinses Armgard zur Lippe-Biesterfeld, begrave waerde.
Wie Beatrix op 30 april 1980 Keunigin waerde zag zie det dae daag Keuniginnedaag bleef. Det waas ein eerbetuin aan häör moder mer ouch prakties: häöre eige verjäördig völt op 31 jannewarie en dan is ’t meistens te kaad om boete fees te viere. Beatrix verangerde ouch de meneer van viere. Zie trok ’t landj in same mit de Keuninklikke Femilie. Zo bezoch zie tösse 1981 en 2012 eder jaor ein of meistal twee plaatse in ein provinsie.
Op 28 jannewarie 2013 goof zie aan aafsjtandj van de troon te wille doon. Daodoor had Keuniginnedaag 2013 ein aafwiekend karakter omdet dae daag ouch Keuning Wullem Aleksander waerde ingehuldigd.
De eerste Keuningsdaag in Nederlandj waas in 2014 in De Rijp en Amstelveen. Det waas nog aje sjtiel omdet dit bezeuk in 2013 waas oetgesjteld waeges de troonswisseling. Prinses Beatrix, Prinses Margriet en Pieter van Vollenhoven ware veur de letste keer d’r bie. Vanaaf 2015 waerde gesjtart mit de nuje sjtiel mit ein nuuj generasie: ’t gezin van de Keuning, Prins Constantijn en Prinses Laurentien en de kienjer van Prinses Margriet mit aanhang. De Keuning der Nederlanden, Prins van Oranje-Nassau, dae zich ouch nog altied, mit ein bietje fantesie, Hertog van Limburg mer zeker Heer van Mofert, moog neume, haet d’r veur gekaoze elk jaor ein sentraal gemeinte te bezeuke. Dit jaor waas Mesjtreech aan de beurt gewaes mer dit geit door ’t Corona-virus neet door.
Teks en foto’s: Guus Rüsing.
’t Waopen van ’t Keuninkriek der Nederlanje met oraanje-eppelkes baove de hoofingank van ’t aad poskantoor aan de Kloosterwandjsjtraot.
Keuningsdaag 2020: Get vazel oraanje vlegskes op ein verlaote Munstersplein.
