De tweede daag det de Kristene herdinke det de Heilige Geis neerkwaam euver de Apostele. In de Middeleeuwe kinde men zelfs drie Pinsterdaag. ’t Verhaol sjteit opgeteikend in ’t Nuje Testament, de Hanjelinge van de Apostele 2: 1-6. D’r kwame tonge van vuur euver de apostele. Die begoste alle völker in häör eige taal toe te sjpraeke. De Heilige Geis waas in häör gevare.
De Heilige Geis waerd döks oetgebeeld door ein doef. In de Middeleeuwe leet men ein laevede doef aan ein tuike los of leet ein houte doef oet de gewelve nao onger vlege. De doef is biezönjer omdet ze zich leet temme en dun bie de miense verbleef. “t waas in vreuger tieje dan ouch al ein simbool veur de vreej. “t Waas de innigste vogel dae eine Joed moogde offere aan God. Wie Kristus geduipt waerde, dus wie de Heilige Geis in hem kwaam, lanjde d’r promp ein doef op ziene kop.
Op de foto is dudelik te zeen det de veurmalige Heilige Geiskerk ontworpe is es koepelkirk. De arsjetek waas Frits Peutz. De kirk is geboewd oet beton en bekleijd mit mergel. Boepesjtoor waas Th.Geelen. De eerste sjtein waerde gelag op 25 mei 1956 en de inzaegening waas op al op 21 mei 1956. In de jaore 1905-1996 vonj d’r nog ein resterasie plaats. Op 9 november 2009 waerde de kirk aan de eredeens onttrokke en op 20 fibberwarie waerde de letste mes gedaon. Dit o.a. door de toenmalige biesjop Frans Wiertz en de langjaorige pesjtoor Vleeshouwers. Allewieles zit d’r ein gezonjdheidssentrum in.
Wie de Krissjtoffelkattedraal aan de Mert waerde gerestereerd waas dees kirk de tiedelikke Kattedraal. En det mit rech. De kirk waas veurneump nao de eerste Kattedraal van Remunj, de Heilige Geiskirk. Die loog op de hook van de Munstersstraot en, wie kint ’t angers, de Heilige Geisstraot.
Teks en foto: Guus Rüsing.
