Kirmes in Remunj. Volges de tredisie begint die op Drievuldigheidszunjig, Trinitatis, de zunjig nao Pinkstere, det is ’t morge. Maar dit jaor door Covid-19 efkes neet. Op deze zunjig in 1665 (dae veel toen op 31 mei) waas ouch kirmes gepland, nao de presessie, wie ’t zich geheurd. Dao is ouch nieks van terech gekomme: Dae daag ontsjtong de tweede sjtadsbrandj. Onger de presessie, tösse ellef en twellef oer sjmörges, sjoot eine sjötter, per ongelök(?) zien musket aaf. ’t Projektiel raakde ein huuske aan ’t Zjwartbrook, det flot in brandj vloog. Taege de veursjrifte van nao 1554, de eerste grote sjtadsbrandj, in, hadde väöl hoezer toch weer streuije daker. In ein jaagvuur, waat zo’n twee toet drie oere doerde, vloog ’t vuur euver ’t grötste deil van de sjtad. Allein ’t gedeilte rondj de Mert mit de Kattedraal, Boetenop en de Veursjtad bleve gesjpaard. De brandj doerde nog twee daag. Eine grote ramp dus.
Sinds 1632 waas Remunj weer Sjpaans onger keuning Philips IV. ’t Waas ingenaome door graaf Ernst-Casimir (dae van de kezerne) dae, es veldjheer van Frederik-Hendrik, daobie sjneuvelde. Hulp kwaam oet ’t ganse Euverketeer van Gelder en wiejer. De keuning van Sjpaanje sjonk mer leefs 17.000 gölje en goof teen jaor vriesjtelling van belasting.
“Ach luuj dreije om de tore, es ’t kariljon van zich leet heure”.
De Speedbooster van de kirmes haet de sjöld det Louisa in ’t Ruremonde van kirmeszunjig 1665 terech kump. Veer lere de orgeldreijer Johannes, mit zeen aepke Funs, kinne en de waorzekster Ananja; die haet eine krisjtalle bol en eine tiedreiziger. Belangriek is Marnix Symons, de jong dae ’t gewaersjot haet aafgevuurd, waat de sjtad in de fik sjtook.
“Ach luuj dreije om de tore, es ’t kariljon van zich leet heure”.
Veer komme ’t eers aan bie “buyten Zwartbruecker porten aen den Zande”. Veer make kinnis mit de herder Wendelinus dae net ein Mariabeeldje haet gevonje in eine pöt. Terechte plaats, de bevolking van Remunj is veur de brandj gevluch nao de kepel, mer verkeerde tied: 1418.
“Ach luuj dreije om de tore, es ’t kariljon van zich leet heure”.
Veer make nog kinnes mit Philippus, de sjnieder, dao miljeu-bewus is en de sjmeed, dae Vulcanus mit ’t vuur es hanjelsmerk haet. Busjop Damianus von und zu Hoensbroeck, mit ziene dieke boek, ontvink os op zien kesjteel Hilleraoj. Veer viere vastelaovend mit Gerrit de nar mit zien sjtekkepaerdje en make ein aezelsmis mit. Veer sjpraeke in de Munsterskirk mit Pierre Cuypers, dae emes bie zich haet. (Waas det mesjien de Franse arsjetek Violet-le-Duc?). De pepiermaeker Matthias leert os get euver de meules op de Roer. Veer misse Keizerin Maria Theresia op ein waek nao veur de heräöpening van de Sjteine Brök.
“Ach luuj dreije om de tore, es ’t kariljon van zich leet heure”.
Veer zjweije nao de orgeldreijer Johannes mit zien aepke Funske. En dae zjweit trök! Alles is good. Marnix is weer toes en Ananja had häöre krisjtalle bol weer truuk.
’t Book “Avontuur in Ruremonde” van Ankie Pijpers-Meisters haet es ongertitel: “Een historische jeugdroman”. Es dusdanig zol ’t verplich motte waere es laesbook veur de gesjiedenisles in groep 8 van elke Remunjse basissjool. Es get ajere, gepensjeneerde, jongere gaef ich hie grif toe det ich ’t in eine aom höb oetgelaeze. Ich wed det d’r meer get ajer Remunjse jonges, (van edere sjtanjd, en wo veer komme, dao rammelt de wandj) zeen die ’t sjtiekum binnekort es vaderdaagkedoo gehad zolle wille höbbe. Gaer gedaon!
In de Remunjse bokewinkels te koup veur 17.43 Euro, ISBN: 0789463187183.
Foto en Teks: Guus Rüsing.
