5 mei 2020, Bevriejingsdaag, de vlagge oet!

Vandaag heurt de Nederlandse vlag te wappere omdet 't de daag van de Bevriejing is. Deze daag waerd ouch waal "De daag van de vrieheid geneump. 't Is de daag det de nazies in 1945 ouch kappituleerde in de provinsies Utrech en Noord- en Zuud-Holland die nog bezat ware.

Op 5 mei 1945 besjproke de Kannedese Generaal Charles Foulkes en de Duitse Opperkommandant Johannes Blaskowitz in Hotel De Wereld in Wageninge die kappitulasie. Prins Bernhard waas dao bie aanwezig es Kommandant van de Binnelandjse Stjriedkrachte. Blaskowitz vroog 24 oere bedinktied en zo waerde de kappitulasie eine daag later, op 6 mei (!) dus pas geteikend. Det gebeurde in de aula van de landjboe-universiteit, naeve Hotel De Wereld.

Dit jaor herdinke veer det dit 75 jaor geleje is. Veer sjtaon sjtil bie de vrieheid die is bevochte door miense die dao grote offers veur höbbe gebrach. Veer viere det veer, sinds 1945, weer in vrieheid laeve mit 't bezei det veer same veranjtwaordelik zeen om dees vrieheid door te gaeve aan nuuj generasies.

't Zol interessant zeen ins te ongerzeuke welke vlagge allemaol in Remunj gewapperd kinne höbbe. Ein veurluipig lieske zol dan kinne zeen: De Gelderse, de Gelders-Gulikse, de Sjpaanse, de Hollandse, de Oosteriekse, de Franse Tricolore, de Belzje, de Duitse Bondj, weer de Hollandse, de Nederlandse en de Hakekruutsvlag.

In de jaore dertig van de veurige eeuw kwaam de Nasjionaal-Sosjelistiese Bewaeging (NSB) op. Die zag det de Nederlandse vlag oranje-blanje-bleu (oraanje-wit-blauw) mos zeen. Dit rammelde histories gezeen nogal tamelik. Om hie ein inj aan te make leet de regering van Hendrik Colijn 't rood-wit-blauw vasligke. Op 19 fibberwarie 1937 teikende keunegin Wilhelmina 't kortste Keuninklik Besjloet waat ooit is genaome: "De kleure van de vlag van 't Keuninkriek der Nederlande zeen rood, wit en blauw". Punt, oet.

Foto en teks: Guus Rüsing.