Op de feertigste daag nao Paose en teen daag veur Pinkstere viere Kristene de Hemelvaart van Jesus Kristus. In het Letiens hit dit Ascensionis Domini. Zodoende väölt ‘s-Herehemelvaart altied op donderdig omdet Paose vasgelach is op zunjig.
Toet in de veerde eeuw waas Hemelvaart gein apaart fees, det kwaam pas in de viefde eeuw op. ’t Waas ein soart van aafsljoeting van de Paosperiode: Deze daag waerde de Paoskaers oetgemaak. Det duit men allewieles neet meer in de liturgie. Omdet dit simbolies zol kinne beteikene det God neet meer onger os is, letterlik: hae haet de kaers oet. Dao kump ouch die oetdrökking vanaaf es emes dood is.
Wie Kristus nao de hemel ging ware zien volgelinge daobie. Hae had häör belaof det de Heilige Geis häör zol komme helpe: Pinkstere. Naodet d’r det belaof had waerde hae opgenaome door ein wolk en waas neet langer meer zichbaar. Ongerwieles det die volgelinge nao baove aan ’t kieke ware kwame d’r twee mansluuj in witte kleijer. Zie zachte: “Galliejejers, waat zeet geer nao dae hemel aan ’t kieke? Jezus, dae oet eur midde in de hemel is opgenaome zal op dezelfde meneer teruuk komme wie det geer um nao de hemel höbt gaon zeen (Hanjelinge I, vers 9-11).
Worom feertig daag nao Paose? Omdet veer veur Paose ouch eine veertigdage tied höbbe: de vastetied. Euverigens duurt de vastetied 46 daag, mer de zunjige telle neet mit omdet me dan neet hoof te vaste.
Maar worom noe juus feertig daag? Det is ein oeraad magisch getal en es zodanig ajer es simbool es ’t Aje Testement. Men dach det feertig euverein kwaam mit ein vol generasie. ’t Haet mit aaj vruchbaarheids tradisies vandoon. Nao häör feertigste koste vrouwe gein kienjer meer kriege dus begos ein nuuj generasie: De aajste kienjer ware rondj dae tied ’t hoes al oet.
In de biebel kump ’t getal feertig regelmaotig veur. Noach wachde feertig daag veurdet hae oet ziene boot sjtapde. Mozes zoot feertig daag op de berg Sinajie. Elia zjworf feertig daag rondj. In ’t Nuje Testament trok Jesus zich feertig daag trök in de woestijn.
Euverigens waerd in Duitsland op deze daag ouch vaderdaag gevierd.
Teks: Guus Rüsing.
