De herinrichting van ’t Cuypershoes is opnuuj gesjtart, en ’t ontwerp van Bureau Caspar Conijn begint langzamerhandj zichbaar te waere in ’t museumgeboew. V’r wille uch alvas wieze op twee heugtepuntje:
– de imposante trappehal. Centraal in ’t geboew sjtaon twee trappe die aanein gesjpegeld zeen. Dit döbbele trappehoes is bekledj mit ’n uniek behang, det besjteit oet fotoos en orzjenele gipsaafgeetsels oet de atteljees van Cuypers. Dit behang, det sjpesjaal veur ’t Cuypershoes is ontworpe, vormp ’n kollaasj van de 800 glaasnegatieve die in 2017 zeen gekonzerveerd en gedigitalizeerd door ’t Nederlands Fotomuseum oet Rotterdam; mit dank aan Bosman Letters & Reclame veur ’t ongeluiflikke pas- en maetwirk.
– de museale objekte. Aafgeloupe waek waas ’n belangriek moment in de herinrichting: de ‘Cuypersobjekte’ komme trök nao Remunj. Vanoet musea, kirke, archieve en partekeleer kolleksies beginne de kuns- en gebroeksveurwerpe trök te komme nao de ‘boewfebriek’ van Pierre Cuypers. Dees museale objekte sjpele ’n belangrieke rol in ’t ontwerp van Bureau Caspar Conijn: eder kamer krieg ’n gans eige thema en sfeer.
Wie de ‘boewfebriek’ d’r dalik oet zal zeen? Bekiek op oos website drie ontwerpe van Bureau Caspar Conijn.
De kroonluchter in de vreugere woonkamer van Cuypers waerd weer op zien plaats gehange. Op dees foto is ’t in 2019 gerekonstruweerde plefong good te zeen.
’t Triomfkruuts van de St. Servaosbaseliek in Mesjtreech is ein van de blikvangers in ’t ontwerp. ’t Houte kruutsbeeld van 7 maeter lank en 4,6 maeter breid waerd op dees foto mit sjtötte taege-n ’t plefong opgehange. Es bezeuker loup g’r dalik onger dit kruuts door.
’t Cuypershoes, Pierre Cuyperssjtraot 1, 6041 XG Remunj, till. (0475) 359102, [email protected]
Nao de heräöpening is ’t Cuypershoes langer aope. Op dinsdig t/m zonjig kint g’r tösse 11 en 17 oer terech. Neet allein veur “800 jaar Munsterkerk”, mer ouch veur de nuje vaste prizzentasie euver ’t laeve en ’t wirk van de Remunjse arsjetek Pierre Cuypers.
