Hubertus Mathias Bertrams waerd gebaore op 25 jannewarie 1874 in Remunj en sjturf op 13 september 1929, pas 55 jaor aad, ouch in Remunj. Ondanks det hae neet aad is gewaore haet hae heel get in Remunj geboewd. Zeen weeg sjting aan de Kepel en hae waas de zoon van Mathias Bertrams en Petronella Timmermans. Zien elders hadde ’t hotel-restaurant “In het Gouden Kruis” tegeneuver de Kepel in ’t Zandj. Dao kwame toendertied doezjende luuj, die op bedevaart ware, get gebroeke of sjlaope. Naeve ’t hotel had de femilie ouch nog eine winkel en ein eige bekkerie.
Mathias volg tösse maert 1893 en maert 1894 lesse aan de “Teekenschool”. Hae is pas 19, en zit nog op sjool, es hae veur Burggraaf Charles A.M.E. van Aefferden in 1893 ’t kesjteel Sjeundele teikent en oetveurt!
Op 15 oktober 1901 trouwt hae mit ’t Remunjs maedje Marie Cunegonde Gertrude Gabriels. Ze wone, mit zien elders, aan de Kepelderwaeg 213, ouch door hemzelf ontworpe.
Op 26 oktober 1907 vreug hae ein boevergunning aan veur ein van zien meistersjtökker, ’t sjtadspandj op de Neersjtraot nommer 49. Op dees plek herboewd hae ein woon- en winkelhoes veur W. Smeets-Spee, de bekkerie “Maison Smeets”. De boewsjtiel is ein sjpeels tradionalisme mit al get préludes op de Jugendsjtiel. ’t Pandj, in drie boelaoge, haet dekorasies van sjtuukwerk rondjom de vinsters, waterlieste en siermetselwerk onger de daakrandj en tösse de rame. ’t Haet ein zadeldaak mit twee, mit fraai sjtuukwerk omlieste, daakkepelle in ovaalvorm.
De eerste boewlaog, de oorsjpronkele winkelpui mit etelaasj, is aangepas veur ’t gebroek es kantoorpandj mit ein deur en twee raampartieje. In al ziene eenvoud, van ’t sjtuukwerk baove de rame toet de repeterende rundjes in ’t metselwerk, kint men dit ein gesjlaagde verboewing neume. Noe zit d’r ’t Missieburo van ’t Bisdom in.
Teks en foto’s: Guus Rüsing.
