De naam “Achter Kloosterwandj”, of eine inkele keer “Taege Kloosterwandj”, waerd al geneump in 1423 en 1448. De sjtraot leep achter de moer van de Munsterabdie. In 1884 waerde det verhollanst nao Kloosterwandstraat. Sinds 1976 waerd de sjtraot in tweje gedeild door ’t Kloosterwandjplein.
Piet Schoenmakers waerde op 24 junie 1919 gebaore in de Remunjse Veursjtad. Vanaaf 1943 tot de jaore tachetig van de veurige eeuw werk hae veur keramies atelje St.Joris in Besel. In 1950 trouwde hae mit Gert van Binnebeke oet Remunj. In 1957 geit hae wone op ’t Hondsbergje in Herte. In 1958 köp hae de Bosmeule in Panhael om die in te richte es atelje. Op 10 april 2009, vlak veur ziene negentigste verjäordig, sjtörf hae in Remunj.
Nao de MULO geit hae nao de Teikensjool in Remunj, dao haolt hae de L.O. en M.O. Aktes Teikene. In 1937 geit hae nao de Rieksakkedemie veur Beeldende Kunste in Amsterdam. In 1941 krieg hae de Prix de Rome veur Grafiek. De daomit gewonne reis nao Rome kint hae, door de oorlog, pas in 1948 make.
Zien relejf aan de ziegevel van de ABN AMRO-bank brink os, aan de veuraovend van de inzaegening van de Munsterabdie op 1 oktober 1220, teruuk nao de jaore 1213 en 1218. Rondj 1200 zal ’t eerste begin van de sjtad ongeveer gewaes zeen tösse de Werf, Achter de Moer, ’t Meulesjträoätje, Aoliesjtraot, noordkantj Munstersplein, Leeg Heksjtraot, Hoog Heksjtraot, St. Jansstjräötje en de Pesjtoorwal. Dit geheel waerd in 1213 door de aafgezatte Duitse Keizer Otto IV van Brunswiek in de fik gesjtaoke omdet de graaf van Gelre partie had gekaoze veur ziene taegesjtenjer Keizer Friedrich von Hohenstaufen.
Meugelik in 1218 waerd dan aan de weskantj van dit Remunj, waat weer in opboew is, begos mit ’t boewe van de Munsterskirk en -abdie. ’t Relejf van Piet Schoenmakers beeldt die gebeurtenisse oet. Of D’n Uul toen al es Vastelaovesvereniging besjting betwiefel ich, maar kiek waal mit.
Teks en foto’s: Guus Rüsing.
