Henricus Johannes Rammers (1878 – 1926) waerde gebaore in Remunj es zoon van Gerard Rammers, sjtadsarsjetek, en Cornelia Lucas. In 1898 geit hae nao Luuk om dao veur arsjetek te lere. Op 27 maert 1902 kump hae, via Tongere, weer teruuk nao Remunj en geit bie zien elders wone. Op 25 september 1906 trouwt hae mit Anna Beekman en geit wone op de Krankewal. In 1918 geit ’t gezin nao Valkeberg. Hae sjtörf op 9 fibberwarie 1926 in Haerle, pas 48 jaor aad. Zien markanste ontwerp in Remunj waas waal de Fu aan de Mesjreeccterwaeg die gesjloop is.
In april 1906 waerd de vergunning aangevraog veur ein horecapandj op de Mert nommer 17. Veer zeen ein orezjeneel kefeepui mit de deur in de midde in ein portiekske en rondjbaogvormige, Jugendsjtiel motieve in de baoveleechter. Eine breije bandj van Naamse sjtein tösse de eerste en tweede boelaog. Dao op ein besjeije, wo veur hulde op dit sjoon pandj, neon beerreklaam. De baoveleechter in de tweede boelaog höbbe ein omliesting van Naamse sjtein die euvergeit in eine breije bandj van Naamse sjtein tösse de tweede en derde boelaog. Hie zeen klein dekorasies gestuuk.
Baove de derde boelaog ouch eine breije bandj van Naamse sjtein mit sjtuukversieringe en de teks: IN DEN GOUDEN APPEL.
Ein daakkepel mit segmentbaogvormig baoveleech en omliesting van in- en oetgesjtulpde Naamse sjtein. Bekroond door eine golje appel.
Teks: Guus Rüsing.
Foto’s: Stoffel.M
