Arsjetek Frans Dupont (1880-1955) waas ouch de ontwerper van dit bekinde pandj aan de Sjteinwaeg nummer 14. ’t Haet beheurlik geit elemente die bie de Jugendstil heure.
Dit pandj waerde ontworpe veur de sjieke maotsjoester Gerard Curvers. In Remunj waas hae ouch bekint es sjellis in ’t simfenieorkes van de Keuninklikke Hermenie en ’t Remunjse Salonorkes. Euveregens waas Frans Dupont dao eerste violis, dus ze höbbe zich zeker perseunlik gekind.
Links, onger de erker mit zien glaas-in-lood rame, waas de woonkamer gesitteweerd; die is noe bie de winkel getrokke. De gevelreljefs links en rechs hie van, die ’t woongedeilte oksentueerde, zeen gelökkig bewaard gebleve zodet me nog kint zeen det dit ein apaart gedeilte waas. Ouch ’t reljef tösse de rame op de eerste verdeping is nog te zeen. ‘De daaklies waas heel sjoon afgewerk mit eine opzat van drie boagepartieje tösse veer in Jugendstil versierde pilasters. Dao is nieks meer van te zeen es drie ermeujige sjtange. Leuk is ’t waal det d’r noe nog eine sjoester inzit: Van Haaren. Kinnelik haet de eigenaer, of eine bewoner, toch bezeij van historie. Kiek mer nao de vinsterdekerasie op de eerste verdeping; det is ein kopie van de geveldekerasie.
Frans Dupont moog gerös gezeen waere es de arsjetek dae de Jugendstil ( Art déco) nao Remunj gebrach haet. D’r zeen nog väöl gevels van hem te zeen in de sjtad. Neet allein in de binnesjtad mer ouch op de singels en de Kepelderwaeg. Hae haet de sjtad mit ziene arsjetektuur, de moder van de kunste, rieker gemaak. Wanneer krieg hae ein eige sjtraot?
Eine laezer sjreef mich, nao aanleijing van mien eerder sjtökskes, det d’r die al had: De Bröksjtraot! Inderdaad “Dupont” beteikent “Van de Brök”. In ’t Remunjs zachte ze “Depong”. Wat mich betref hit de Bröksjtraot vanaaf vandaag de “Frens Depongsjtraot”.
Foto en teks: Guus Rüsing.
